By: Dr Sivachandran Sivagnanam

Visiting Obstetrician and Gynaecologist (VOG) at BH Pointpedro
(வைத்தியரின் Facebook பதிவிலிருந்து. அவரது அனுமதியுடன் மீள் பிரசுரம் செய்யப்படுகிறது.)

அண்மைக்காலமாக வீட்டுப்பிரசவம் பற்றிய பேச்சு பரவலாக அடிபடுகிறது.

நிறையப்பேர் வைத்தியசாலைப் பிரசவம் ஏதோ இலுமினாட்டிகளின் சதி என்ற ரீதியில் கருத்திட்டுக்கொண்டிருக்கிறார்கள். இந்தியாவில் ஹீலர் பாஸ்கர் தொடக்கம் இலங்கையில் பின்னூரி எனப்படுபவர்கள் வரை வீட்டுப்பிரசவத்துக்காக மக்களை மூளைச் சலவை செய்துகொண்டு இருக்கிறார்கள்.

அவர்கள் வைக்கின்ற வாதம் எங்கட பாட்டி மார் வீட்டுப்பிரசவம்தானே செய்துவந்தார்கள். அவர்கள் எந்தப்பிரச்சினையும் இல்லாமல் ஆறேழு பிள்ளைகளைப் பெறவில்லையா?

அது உண்மைதான், ஒரு கர்ப்பிணியை வீட்டுப்பிரசவம் பார்க்கவிட்டால், குழந்தை தானாகப் பிறந்துவிடும். ஆனால் எல்லாப் பெண்களுக்கும் அவ்வாறு சுகப்பிரசவம் வீட்டிலேயே நடந்து விடுமா?

இதற்குப் பதில் கூற முதல் ஒரு தரவினைக் கூறுகிறேன்.

1990 ஆம் ஆண்டு இலங்கையில் ஒரு லட்சம் கர்ப்பிணிகள் குழந்தை பெற்றால், அதில் 95 பேர் இறந்துவிடுவார்கள்.

ஆனால், கடந்தவருடம் இலங்கையில் குழந்தை பெற்றுக்கொண்ட ஒரு லட்சம் பேரில் 35 பேர்தான் இறந்தார்கள்.

அதாவது குழந்தை பெற்றுக்கொள்ளும் ஒரு லட்சம் அம்மாக்காளில் 60 பேர் இறப்பது தவிர்க்கப்பட்டுள்ளது.

இதே கணக்கை நாம் மற்றைய தெற்காசிய நாடுகளோடு ஒப்பிட்டால் அனைத்து நாடுகளிலும் இது 50 ஐத் தாண்டும். தெற்காசியாவிலே மிகவும் குறைவான தாய் மரன வீதத்தைக் கொண்டிருக்கும் நாடாக இலங்கை மட்டுமே இருக்கின்றது.

இந்த எண்ணிக்கையை இன்னும் 15 மரணங்கள் வரைக்குறைத்தால் நாம் ஒரு அபிவிருத்தி அடைந்த நாட்டுக்கு சமனாக வந்துவிடுவோம்.

இந்தியாவில் ஒரு லட்சம் அம்மாக்களில் நூற்றுக்கணக்கானோர் இறக்க, இலங்கையில் 35 பேர் மட்டுமே இறக்குமளவுக்கு நிலமை முன்னேறியதற்குக் காரணம் என்ன?

Suorce:- https://knoema.com/atlas/Sri-Lanka/Maternal-mortality-ratio

இந்தியாவில் நடைபெறும் வீட்டுப்பிரசவங்களை இன்னும் முற்றுமுழுதாக கட்டுப்படுத்த முடியவில்லை, ஆனால் இலங்கையில் சில மறைக்கப்பட்ட கர்ப்பங்கள் தவிர அநேகமான அனைத்துப் பிரசவங்களும் வைத்தியசாலைகளிலேயே நடைபெறுகின்ற அளவுக்கு நாம் முன்னேறிவிட்டதுதான் முக்கியமான காரணம்.

கர்ப்பிணி எனப்படுவதும், பிரசவமும் எனப்படுவதும் ஒரு சாதாரண உடற்தொழிற்பாடு(Normal Physiological Condition). அவர்களை நோயாளி என்று சொல்வதே தவறு. இருந்தாலும் எதற்காக ஒரு கர்ப்பிணியை கர்ப்பம் தரித்த ஆரம்பம் முதல் கிளினிக் வரச் சொல்கிறோம்?

கர்ப்பம் காரணமாக ஒரு பெண்ணுக்கு எந்தச் சிக்கலும் வராமல் இருக்கும் வரைக்குத்தான் அவர் நோயாளி அல்ல. ஆனால் கர்ப்பம் தரிக்க முன் ஒரு பெண்ணுக்கு இருக்கும் நோய்களால் ஒரு கர்ப்பிணிக்கு பல ஆபத்துக்கள் வரலாம். கர்ப்பம் தரிக்க முன் சுகதேகியா இருந்தாலும், கர்ப்பம் காரணமாக சில நோய்கள வந்து ஆபத்தான நிலைக்குச் செல்லலாம்.

எந்தப்பெண்ணுக்கு இந்த ஆபத்துக்கள் வரும் என்று கண்டுபிடிப்பதற்காகவே ஒரு பெண்ணை கிளினிக்குக்கு வரச் சொல்லப்படுகிறது.

உதாரணமாக, சில இதய நோய்கள் இருக்கும் பெண்களுக்கு கர்ப்பம் தரிப்பது ஆபத்தாகலாம். இதய நோயின் தீவிரத்தைப் பொறுத்து அந்த ஆபத்து மாறுபடலாம். ஆகவே முதல் கிளினிக்கிலேயே இதய நோயின் தீவிரத்தை அறிந்து, அதி தீவிரமான நோய் உள்ளவர் என்றால், கருக்கலைப்பு பரிந்துரைக்கப்படும். தீவிரம் குறைந்த நோய் என்றால் தொடர்ச்சியாக குழந்தை பிறக்கும்வரை அவரின் நோயின் தீவிரத்தன்மை கண்கானிக்கப்படவேண்டும். பிரசவத்தின்போது இதயநோய் மேலும் சடுதியாக தீவிரமடையும் என்பதால் மற்றைய கர்ப்பிணிகளைவிட அவருக்கு மேலதிக தொடர்ச்சியான கவனிப்பு வழங்கப்படும். இது ஒரே ஒரு உதாரணம் மட்டுமே, இப்படி ஏராளமான உதாரணங்கள் இருக்கின்றன.

அதேபோல், சுகதேகியாக இருக்கும் ஒரு கர்ப்பிணியும் கர்ப்பம் காரணமாக சில நோய்களைப் பெற்றுக்கொள்ளலாம்.

உதாரணமாக கர்ப்பகால பிரசர் நோய் (Pregnancy Induced Hypertension) என்றொரு நோய் உள்ளது.
சுகதேகியாக இருக்கும் ஒரு கர்ப்பிணிக்கு சடுதியாக 5 மாதங்களுக்குப் பிறகு இந்த நோய் எப்போதும் ஏற்படலாம். இந்த நோய் குழந்தை பிறந்தவுடன் சரியாகிவிடும். ஆனாலும் சரியாகக் கண்டுபிடித்து சரியான மருத்துவம் பார்க்காவிட்டால் , இது தாய், குழந்தை என இருவரிலுமே மரணத்தை ஏற்படுத்திவிடுமளவுக்கு ஆபத்தாகலாம்.

உலகளவில் கர்ப்பிணிகளில் மரணத்தை ஏற்படுத்தும் நோய்களில் முக்கிய காரணங்களில் ஒன்றாக இன்னும் இந்த நோய் உள்ளது. இதன் பாதிப்புக்களைத் தடுப்பதற்கு இலகுவான வழி, ஒரு கர்ப்பிணியின் பிரசரினை ஒழுங்காக கண்கானிப்பதே. அதனால்தான் ஒரு கர்ப்பிணி கிளினிக் போகும் ஒவ்வொரு தடவையும் அவரின் பிரசர் பரிசோதிக்கப்படுகிறது.

அபிவிருத்தயடையாத நாடுகள் பலவற்றிலும் தாய்மரணத்தை ஏற்படுத்தும் நோய்களில் முக்கிய நோயாக இது இருந்தாலும், இலங்கையில் இதனால் ஏற்படும் மரணங்கள் தடுக்கப்பட்டு, தாய் மரணத்தை ஏற்படுத்தும் காராணங்களில் இந்த நோய் 4 அல்லது 5 வது இடத்துக்கு தள்ளப்பட்டுவிட்டது. இதற்குக்காரணம், அநேகமாக அனைத்துக் கர்ப்பிணிகளும் கிளினிக்குக்கு வருவதுதான்.

இப்படிப் பல நோய்கள் உள்ளன.

நச்சுக்கொடி கீழிறக்கம் (Placenta Previa) என்றொரு நிலை உள்ளது. நச்சுக்கொடி என்பது அம்மாவில் இருந்து பிள்ளைக்கு இரத்தத்தைக் கொண்டு செல்ல உதவும் ஒரு உறுப்பு. இது நிமிடத்துக்கு ஒரு லீட்டருக்கும் மேலான இரத்தத்தை கடத்துகிறது. இது சாதாரணமாக கருப்பையின் மேல் பகுதியில் இருந்து குழந்தை பிறந்தவுடன் பிரிந்து வெளியேறியவுடன் கருப்பை சுருங்குவதால் இரத்தப்போக்கு ஏற்படாமல் பாதுகாக்கப்படும். சில பெண்களுக்கு இது கர்ப்பைப்பையின் கீழ்ப்பகுதியில் இருக்கும். சிலவேளைகளில் இது முழுவதுமாக கீழிறங்கி கர்ப்பை வாசலை மூடிக்கொண்டிருக்கும். அந்தசர்ப்பத்தில் கர்ப்பை வாசல் மூடப்பட்டுவிட்டதால் குழந்தை சுகப்பிரசவமாக பிறக்கவே முடியாது. ஒரே வழி சிசேரியன் தான். அதையும்தாண்டி சாதாரணபிரசவம் என்றால் நச்சுக்கொடி சிதைவடைந்து குழந்தை பிறக்கமுன்னமே அதிகமான இரத்தப்போக்கு ஏற்படும்.மேலே சொன்னதுபோல நச்சுக்கொடி நிமிடத்துக்கு ஒரு லீட்டர் அளவான குருதியை வைத்திருக்கும் உறுப்பு. ஆகவே இரத்தப்போக்கு ஏற்பட்டால் ஒரு சில நிமிடங்களிலேயே பல லீட்டர் இரத்தம் வெளியேறி தாய் மரணம் ஏற்படலாம்.

இதைத் தடுக்க சிறந்தவழி ஸ்கேன் மூலம் நச்சுக்கொடி எங்கே இருக்கின்றது என்று முன்னமே கண்டு பிடிப்பதுதான்.

கர்ப்பைப்பையிலே குழந்தைகள் இறப்பதைக் கேள்விப்பட்டு இருப்பீர்கள். இதற்கு முக்கிய காரணம் குழந்தைக்குப் போதிய இரத்தம் செல்லாமல், குழந்தையின் வளர்ச்சி பாதிப்பதே. இதைத் தடுக்க ஒரே வழி குழந்தையின் வளர்ச்சியைக் கண்காணித்து வளர்ச்சி பாதிக்கப்பட்ட குழந்தைகளை அவை இறக்க முன்னமே பிறக்கச் செய்வதுதான். அதற்காகத்தான் ஒவ்வொரு கிளினிக்கிலும் ஒரு கர்ப்பிணியின் வயிற்றிலே அளவு நாடா வைத்து கர்ப்பையின் உயரம் அளக்கப்படுகிறது.அதுபோல ஏழு மாதத்தின் பின் ஸ்கேன் செய்து குழந்தையையின் வளர்ச்சி அவதானிக்கப்படுகிறது. அவ்வாறு செய்யாவிட்டால், வளர்ச்சி பாதிக்கப்பட்டு கருவிலேயே இறந்துவிடும் குழந்தைகளைக் காப்பாற்றுவது சாத்தியமே இல்லை.

இவையெல்லாம் கர்ப்பகாலத்தில் ஏற்படக்கூடிய ஆயிரக்கணக்கான பிரச்சினைகளில் ஒரு சில மட்டுமே. இவற்றையெல்லாம் தடுக்க ஒரு கர்ப்பிணி தொடர்ச்சியாக கிளினிக் செல்வது கட்டாயமானதாகும்.

அடுத்து பிரசவத்தின் போது,

நேற்று முன் தினம் இரவு 11 மணி.

பிரசவ வலியுடன் வந்திருக்கும் ஒரு பெண்ணின், கர்ப்பத்தில் இருக்கும் குழந்தையின் இதயத்துடிப்பு சந்தேகமாக உள்ளதாக அழைப்பெடுத்தார், கடமையில் இருந்த வைத்தியர்.

நான் சென்று பார்த்தபோது ஆரம்பத்தில் சந்தேகத்துக்குரியதாக இருந்தாலும் பிறகு இதயத்துடிப்பு சீராகி இருந்தது. இந்த நிலை அவசரமாக சீசர் செய்யவேண்டியதில்லை என்பதால், தொடர்ச்சியாக குழந்தையின் இதயத்துடிப்பைக் கண்காணித்துக்கொண்டு சாதாரன பிரசவத்துக்கு விடுவது, பிரசவம் நடக்கமுன் மீண்டும் இதயத்துடிப்பு ஆபத்தான நிலைக்குச் சென்றால் சீசர் செய்வதென முடிவெடுத்துவிட்டு வந்துவிட்டேன்.
அங்கே தொடர்ச்சியாக இரவு 11 மணிமுதல் அதிகாலை 2.30 வரை குழந்தையின் இதயத்துடிப்பை ஒரு தாதியும் , மிட்வைஃப்பும் கண்காணித்துக்கொன்டே இருந்தனர். சரியாக அதிகாலை 2.30 மணிக்கு மீண்டும் இதயத்துடிப்பு அசாதாரண நிலைக்குச் செல்வதாக அழைப்பு. போய்ப் பார்த்தால், அதற்குமேலும் சாதாரண பிரசவத்துக்கு விட முடியாத நிலை. விட்டால் குழந்தை இறக்கலாம் அல்லது குறைபாடுள்ள பிள்ளையாக பிறக்கலாம் என்பதால் உடனடியாக சத்திரசிகிச்சை செய்வதென்று முடிவெடுத்து அதிகாலை 2.30 மணிக்கே சத்திரசிகிச்சை செய்யப்பட்டு குழந்தை காப்பாற்றப்பட்டது.

அந்தச் சத்திரசிகிச்சைக்காக, ஒரு மயக்க மருந்து வைத்தியர், இரத்தம் தேவைப்பட்டால் வழங்கும் வைத்தியர், குழந்தை பிறந்தவுடன் பராமரிக்கும் குழந்தை நல வைத்தியர், சத்திர சிகிச்சையின்போது உதவி வைத்தியர் என 4 வைத்தியர்கள் அழைக்கப்பட்டார்கள்.

அதுதவிர சத்திரசிகிச்சைக்கு உதவ இரண்டு தாதிகள், குழந்தையைப் பராமரிக்கும் மிட்வைஃப், நோயாளியை சத்திரசிகிச்சைகூடத்துக்கு கொண்டுசெல்ல ஒரு உத்தியோகத்தர், சத்திரசிகிச்சையின்போது லைட்டினை சரியாக வைத்தல் போன்ற உதவிகளுக்காக ஒரு உத்தியோகத்தர் என கிட்டத்தட்ட 10 பேர் சேர்ந்துதான் அந்த சத்திர சிகிச்சை செய்யப்பட்டு குழந்தை காப்பாற்றப்பட்டது. அந்த ஒரு குழந்தையைக் காப்பாற்ற அரசாங்கம் செலவழித்தது பல இலட்சங்களாகும்.

இவ்வாறு ஒவ்வொரு வைத்தியசாலைகளிலும் ஏராளமான குழந்தைகளும் தாய்களும் காப்பாற்றப்பட்டுக் கொண்டே இருக்கிறார்கள்.

என் விடுதியில் கடந்த இரண்டு வாரத்தில் கிட்டத்தட்ட 25 குழந்தைப்பேறுகள் நடைபெற்றன. அதில் 24 தாய்கள் எந்தப்பிரச்சினையும் இல்லாமல் குழந்தையைப் பெற்றுச் சென்றனர். ஆனால் இந்த ஒரு தாய்க்கு மட்டுமே சிக்கல் வந்தது. சிலர் சொல்வதுபோல் இந்த 25 தாய்களையும் வீட்டுப்பிரசவத்துக்கு அனுமதித்தால், 24 பேர் எந்தப்பிரச்சினையும் இல்லாமல் குழந்தை பெற்றிருக்கலாம். ஆனால் இந்த ஒரு தாயின் குழந்தை நிச்சயம் இறந்திருக்கும் அல்லது குறைபாடுள்ள குழந்தையாகி இருக்கும். அந்த ஒரு குழந்தையைக் காப்பாற்றவே நாங்கள் எல்லாக் கர்ப்பிணிகளையும் இரவு பகல் பார்க்காமல் கண்காணிக்கின்றோம்.

அபிவிருத்தி அடையாத நாடுகளில் குழந்தை பிறந்த பின் ஏற்படும் அதிகமான இரத்தப்போக்கே தாய்களின் மரணத்துக்கான முதல் காரணி. இலங்கையில் இதுவல்ல முதல் காரணி, காரணம் அநேகமாக பிரசவங்கள் வைத்தியசாலைகளில் நடைபெறுவதே.

குழந்தை பிறந்தபின், அனைத்துப் பெண்களுக்குமே இரத்தப்போக்கினை தடுப்பதற்கான மருந்து கொடுக்கப்படவேண்டும். அதனால்தான் மேலே சொன்ன 25 கர்ப்பிணிகளில் ஒருவருக்குக்கூட இரத்தப்போக்கு ஏற்படாமல் தடுக்கப்பட்டது. வீட்டுப்பிரசவத்தில் இது சாத்தியமில்லை.

வெளிநாடுகளே இப்போது வீட்டுப்பிரசவத்துக் மாறிவிட்டன என்பது இந்த பின்னூரிகளின் வாதம்.

உண்மைதான். இங்கிலாந்தில் சில பெண்கள் வீட்டுப்பிரசவத்துக்கு விடப்படுவார்கள். ஆனால் எப்படி?

முதலில் ஒரு வைத்திய நிபுணர் அந்தக் கர்ப்பிணியைப் பரிசோதித்து, அவருக்கு எந்தவிதமான ஆபத்து நிலையும் இல்லை என முடிவெடுப்பார். எல்லாப்பெண்களும் அவ்வாறு அனுமதிக்கப்படமாட்டார்கள்.
அதன்பின் வீட்டிலே பிரசவத்தின்போது பயிற்றப்பட்ட இரண்டு உத்தியோகத்தர்கள் இருப்பார்கள்.
எப்போதும் ஒரு அம்பியூலன்ஸ் அம்மாவைத் தேவைப்பட்டால் ஒரு சில நிமிடங்களிலேயே வைத்தியசாலைக்கு அழைத்துச் செல்ல ரெடியாக இருக்கும். வைத்தியசாலையில் வைத்தியர்களின் தலைமையில் ஒரு அணி எப்போது ஆயத்தமாக இருக்கும்.

இவை எல்லாம் இருந்தால் இங்கிலாந்தில் அல்ல இங்கேயும் வீட்டுப்பிரசவத்துக்கு அனுமதிப்பதில் ஒரு சிக்கலும் இல்லை.

ஆனால் இலங்கையில் இது சாத்தியப்பட இன்னும் பல நூறாண்டுகள் தேவைப்படும் என்பது எல்லோருக்கும் தெரியும். ஆனால், இந்த பின்னூரிகளும், ஹீலர் பாஸ்கர்களும் ஏதோ ஒரு வெளிநாட்டுப்பத்திரிகையில் வரும் தலைப்புச் செய்திகளை மட்டும் பார்த்துவிட்டு ஏதோ நாங்கெல்லாம், இலுமினாட்டிகளிடம் நேராக கோடிகளைப்பெற்றுத்தான் கர்ப்பிணிகளை வைத்தியசாலைக்கு வரச் சொல்வதாக எழுதிக்கொண்டிருக்கிறார்கள்.

இவைதவிர ஒரு பிரதேசத்தில் கர்ப்பிணிகளின் தரவுகள் பதியப்பட்டு அமைச்சுக்கு அனுப்பவேண்டியதும் முக்கியமான விடயமாகும். அதன்மூலமே அந்தப் பிரதேசத்தில் உள்ள கர்ப்பிணிகள், அந்தப்பிரதேசத்தில் கர்ப்பிணிகளுக்குப் பொதுவாக ஏற்படும் பிரச்சினைகள் போன்றவற்றை அதிகாரிகள் அறிந்து அவற்றுக்கான நடவடிக்கைகளை எதிர்காலத்தில் எடுக்க முடியும். கர்ப்பிணிகளின் கவனிப்புக்காக பணம் , உத்தியோகத்தர்கள், தேவையான உபகரணங்கள் போன்றவற்றை ஒதுக்குவதற்கும் இந்தத் தரவுகள் அத்தியாவசியமானது.

என் மனைவி கர்ப்பமாக இருக்கும்போதுகூட என் பிரதேச மிட்வைப் கிளினிக்கில் பதிந்து, கிளினிக் அழைத்து சென்றேன். என் மனைவியை ஒரு மிட்வைஃப் பார்க்கவேண்டிய தேவை இல்லை. ஆனாலும், என் பிரதேசத்தில் இருக்கும் ஒரு கர்ப்பிணியாக என் மனைவியின் தரவுகள் உரிய அதிகாரிகளிடம் கொடுக்கப்படவேண்டியது ஒரு சமூகப் பொறுப்பாகும் என்பதால் அந்தக் கிளினிக் சென்றுவந்தோம்.

ஆகவே, நீங்களும் கர்ப்பம் தரித்தவுடன் முதலில் செய்ய வேண்டியது, உங்கள் பிரதேசத்துக்குப் பொறுப்பான மிட்வைஃப்யிடம் அறிவிக்கவேண்டியதே. அதன்பின், உங்களுக்குத் தேவையான அனைத்தையும் அவரே செய்துகொடுப்பார்.

சும்மா பேஸ்புக் லைக்குக்களுக்காகவும், மத நம்பிக்கைகள் என்ற பெயரில் சொல்லப்படும் முட்டாள்தனமான கருத்துக்களுக்காகவும் உங்களையும் உங்கள் குழந்தையையும் பலியாக்கி விடாதீர்கள்.

 

சிலர் சமூக வலைத்தளங்களில் அக்காலத்தில் வீட்டு பிரசவத்தில் மரணங்கள் ஏற்படவில்லை என்கின்றவாறு கருத்து தெரிவித்து வருகின்றனர். அவர்களுக்காக இத்தகவல்.
இலங்கை பதிவாளர் திணைக்களத்திடம் இருந்து 1911 முதல் 

 

உலகளாவிய தாய் சேய் மரண வீதம். Fact Sheet ஒவ்வொரு நாடும் தனி தனியே தரவுகள் உள்ளன. (Click the Lin for Details)
https://www.cia.gov/library/publications/the-world-factbook/fields/2223.html

 

உலகளாவிய தாய் சேய் மரண வீதம் UNICEF தரவுகள்

Source:- https://data.unicef.org/topic/maternal-health/maternal-mortality/ 

 

உறுதிப்படுத்தப்பட்ட சுகாதார தகவல்களுக்கு எமது பக்கத்தை Like செய்து இணைந்திருங்கள்.
https://www.facebook.com/LankaHealthTamilPage/

COVID-19 பற்றிய உறுதிப்படுத்தப்பட்ட தமிழ்மொழிமூலமான செய்திகளுக்கு இதனை Click செய்க.

4,370 total views, 2 views today